Patay ang labing menos 11 ka mga tawo, lakip ang tulo ka mga bata human nahugno ang usa ka residential building sa amihanan-sidlakang New Delhi.
Nahitabo ang insidente sa usa ka distrito nga kasagarang gipuy-an sa mga trabahante u sumala sa mga taho, 11 ka mga tawo ang gideklarar nga patay samtang 11 ang naluwas ug gidala sa tambalanan ug ang lima niini kay padayon pa nga gitambalan.
Nagpahayag na usab og pahasubo si Indian Prime Minister Narendra Modi sa mga nagbangutan nga pamilya pinaagi sa social media.
Ingon man nga miluwat na usab og pamahayag si President Droupadi Murmu ug miingon nga nasubo usab kini sa pagkamatay sa daghang mga tawo, lakip ang mga babaye ug mga bata.
Wala pa’y opisyal nga taho sa hinungdan sa pagkahugno, apan ang ministro sa Delhi nga si Kapil Mishra nagpunting sa giingong korapsyon sa lokal nga gobyerno, nga gipangulohan sa kaatbang nga partido, ingon nga hinungdan sa pagdaghan sa mga ilegal nga mga bilding.
