CENTRAL VISAYAS-Miabot sa sobra 115,000 ka mga pamilyang Bisaya ang naka-gradwit na sa programa sa gobyerno nga Pantawid Pamilyang Pilipino Program (4Ps) matod pa sa Department of Social Welfare and Development – Central Visayas (DSWD-7).
Sumala sa ahensya nga anaa sa kintibuk-ang ihap sa 115,729 ka mga family beneficiaries ang na-cleared to graduate sa maong programa.
Sa maong ihap, 79,205 niini kay gikan sa Sugbo samtang 36,524 kay gikan sa lalawigan sa Bohol.
Ang Graduation Ceremonies nga giilang Saulog 4Ps Ceremonial Graduation” kay gihikay sa matag Local Government Units sa rehiyon.
Diin pipila na ka lungsod ug dakbayan ang nakahipos sa maong seremonyas sama sa lungsod sa Consolacion, Liloan, ug dakbayan sa Danao sa amihanang Sugbo; dakbayan sa Mandaue ug Lapu-lapu sa Metro Cebu Tri-cities; ug lungsod sa Asturias sa kasadpang Sugbo.
Samtang sa lalawigan sa Bohol kay nakapahigayon na ang lungsod sa Talibong ug Dauis.
Ang mga pamilyang ni-gradwar kay giila na isip self-sufficient sumala sa Social Welfare Development Indicator (SWDI) nga maoy gigamit nga sukaranan sa DSWD sa kapabilidad sa matag benepisyaryo nga makabarug na sa ilang kaugalingog pangita.
Ang 4Ps program kay gilusad niadtong tuig 2008 ug na-institutionalized niadtong tuig 2019 diin principally authored ni kanhi Senador Leila de Lima ug co-authorship ni Senador Risa Hontiveros nga nagtumong sa paghatag og conditional cash grants sa mga low-income households ug pagdalit sa mg hinabang sama sa edukasyon, kalawasan, nutrisyon, ug sa grabeng kapobrehon.
