Nabuhi pagbalik ang usa ka 50-anyos nga babaye nga giingon sa mga doktor nga brain-dead na ug wala nay paglaum, apan kalit lang nakamata pag-usab human ang ambulansya nga nagdala niini mibangga sa dakong lubak sa dalan.
Basi sa taho nga nawad-an og panimuot si Vineeta Shukla samtang nagtrabaho sa balay ug gidala sa ospital.
Tungod sa iyang grabeng kahimtang, gi-transfer siya sa lain nga tambalanan. Didto, giingon sa mga doktor nga dili na siya makamata kay ubos kaayo ang iyang lebel sa kahimatngon.
Tungod ani, nagdesisyon ang iyang pamilya nga paundangon na ang pagtambal ug nangandam na para sa iyang lubong. Apan, samtang gisakay siya sa ambulansya, nakaagi kini og lubak ug nakurat siya.
Gidala siya balik sa ospital ug nakurat usab ang mga doktor kay nakamata kini.
Bisan pa ani nga milagro, ang uban nag-ingon nga talagsaon ra kaayo ni nga hitabo ug dili makapuli sa daghang namatay tungod sa mga aksidente sa lubak sa India.
