Nakauli na sa Pilipinas ang patayng lawas sa usa ka Overseas Filipino Worker (OFW)—kinsa namatay samtang nagmaneho atol sa usa ka pag-atake gamit ang drone sa Saudi Aramco Shaybah oilfield niadtong Oktubre 21.
Miabot ang patayng lawas sakay sa usa ka flight sa Saudia Cargo. Diin ang Department of Migrant Workers (DMW) ug ang Overseas Workers Welfare Administration (OWWA) nakigkita sa pamilya sa biktima, ug ang ilang mga opisyal nipaabot usab sa ilang pahasubo.
Ang amo sa namatay nga OFW maoy nag-asikaso sa mga gikinahanglang pamaagi, inabagan sa Migrant Workers Office sa Al Khobar, sa Embahada sa Pilipinas sa Riyadh, ug sa mga awtoridad sa Saudi.
Ingon man nga ang amo usab ang nagpahigayon sa pagproseso sa wala pa mabayri nga sweldo, mga benepisyo sa pagtapos sa trabaho, ug uban pang mga katungod nga angay madawat sa namatay nga OFW.
Ang DMW ug OWWA nagpadayon sa pagsuporta sa pamilya sa biktima pinaagi sa paghatag og pinansyal nga tabang ug hinabang alang sa paglubong, ingon man suporta sa edukasyon alang sa mga anak sa namatay nga OFW.
