CEBU CITY-Gipabakwit na karon ang 12 ka pamilya nga nagpuyo sa bukana sa Estero de Parian, partikular na sa Barangay San Roque, human gipadayon sa siyudad ang paghawan sa ilang mga pinuy-anan nga gikatahong nakababag sa pag-dagayday sa tubig hinungdan sa grabeng pagbaha sa kasikbit nga mga dapit.
Una nang nipadayag si PROBE Head Aderson Comar ngadto sa Task Force Gubat sa Baha nga wala nay lugway nga ihatag sa maong mga illegal settlers, tungod kay nahutdan na sila og panahon sa paghawan sa lugar.
Kagahapon, ang mga personahe sa PROBE, uban sa Engineering ug uban pang departamento sa dakbayan, niduso na sa gikatakdang clearing operations sa maong dapit.
Tungod kay kadaghanan sa mga materyales nga gigamit sa mga istruktura sa daplin sa suba ginama sa gaan nga mga materyales, ang kalihokan sa paghawan nahuman sulod lamang sa usa ka adlaw.
Sa pagsulat niini nga balita, kadaghanan sa mga apektadong pamilya, nga adunay kapin sa 60 ka indibidwal, nangitag temporaryong kapuy-an sa barangay hall sa San Roque.
Gihatagan sila og usa ka buwan nga mabalhin sa relocation site niini sa Quiot, Pardo, Cebu City.
Ang kagamhanan sa dakbayan sa Sugbo nigahin na og relocation site alang sa mga pamilya nga naapektuhan sa clearing operations.
Sa sayo pa ang mga pamilya nangayo usab og pinansyal nga tabang atol sa ilang pagbalhin, apan si City Councilor Jerry
Guardo nitug-an nga modawat sila og financial assistance o permanenteng lugar alang sa relokasyon.
Hinuon, si Guardo niingon nga ang kagamhanan sa dakbayan makatabang nila sa pagbalhin sa ilang relocation site pinaagi sa paghatag kanila og mga sakyanan nga ihatod sa ilang mga butang ug mga housing materials aron makasugod na usab sa ilang kinabuhi sa bag-ong lokasyon.
