Patay ang labing menos 12 ka tawo samtang 10 pa ang nasamdan human nabalintuwad ang usa ka bus nga adunay Polish registration sa usa ka motorway sa Hungary.
Matod sa Hungarian police, nahitabo ang aksidente sayo sa Domingo duol sa Mezőkeresztes samtang padulong sa lungsod sa Nyiregyhaza ang bus.
Base sa inisyal nga imbestigasyon, misimang sa dalan ang bus, nahulog sa kanal ug nabalintong.
Adunay 57 ka pasahero ug duha ka drayber nga sakay sa bus.
Giingon sa mga otoridad nga usa sa posibleng hinungdan sa aksidente mao ang pagkatulog sa drayber samtang nagmaneho.
Gidala na sa mga ospital ang mga nasamdan alang sa medikal nga pag-atiman, samtang gidakop sa mga awtoridad ang drayber sa bus.
Nagpahayag usab og pakigduyog si Polish President Karol Nawrocki sa mga pamilya sa mga biktima.
Samtang, ang Polish Foreign Ministry miingon nga nakigkontak na ang mga opisyal sa konsulado sa Poland sa mga awtoridad sa Hungary aron makuha ang dugang nga mga detalye bahin sa aksidente.
