12 patay, 30 samdan sa suicide bombing sa checkpoint sa Pakistan

Napatay ang 12 ka tawo samtang 30 ang nasamdan sa usa ka suicide bombing sa checkpoint sa kapulisan sa amihanan-kasadpang bahin sa Pakistan.

Nahitabo ang pagpamomba sa distrito sa Dera Ismail Khan sa probinsya sa Khyber Pakhtunkhwa.

Human sa pagbuto, nakadungog ang mga awtoridad og sunod-sunod nga mga buto sa pusil sa maong lugar.

Matud ni Police Chief Safdar Baloch, kadaghanan sa mga biktima mga security personnel ug mga tawo nga nangagi sa maong lugar.

Wala pay grupo nga miangkon sa responsibilidad sa pag-atake.

Apan, nagduda ang mga awtoridad nga nalambigit niini ang Pakistan Taliban, o Tehrik-e-Taliban Pakistan (TTP), nga nalambigit na kaniadto sa mga pag-atake sa maong nasod.