CEBU – Nadawat na sa 13 ka mga migradwar sa community-based drug rehabilitation program ang ilahang financial assistance pinaagi sa sustainable livelihood program sa City Social Welfare Development Office (CSWDO) sa syudad sa Lapu-Lapu.
Gibutyag ni Garry Lao, City of Lapu-Lapu Office for Substance Abuse Prevention (CLOSAP) head, nga nakadawat ug tag-P5,000 cash isip pagsugod sa livelihood o panginabuhi-an sa maong mga ‘Person Who Used Drugs (PWUDs) graduates’.
Matud pa, 12 niini ang gikan sa Barangay Subabasbas ug 1 sa Barangay Talima sa naasoy nga syudad diin sa kapin 40 ka mga PWUDs kay kini lang sila ang nakapasar sa assessment nga gipahigayon sa CSWDO alang sa SLP.
Gipahibalo ni Lao nga mismong si Lapu-Lapu City Mayor Junard ‘Ahong’ Chan ang mitunol sa maong cash assistance ug ingon man nga duha niini ang ‘on-the-spot’ nga gi-hire isip mga job order employees ug ugmang adlawa magsugod na kini sa ilahang trabaho isip mga driver sa syudad.
