Gipatawag ni Gobernador Pamela Baricuatro ang Provincial Price Monitoring Council (PPMC) niadtong Martes, Marso 10, aron tuki-on ang kabalaka sa presyo sa mga nag-unang paliton taliwala sa nagkagrabe nga tensyon sa Middle East.
Kini nga lakang kabahin sa paningkamot sa kagamhanan sa probinsya aron masiguro ang kalig-on sa presyo ug mapugngan ang pagpamintaha sa mga negosyante, dungan sa pakig-alayon sa mga nasyonal nga ahensya alang sa pagbantay sa suplay ug pagpatuman sa balaod alang sa mga konsumidor.
Sa usa ka tigum nga gipahigayon sa Kapitolyo, gipasidan-an sa Gobernador ang mga retailers nga mupahimus sa sitwasyon pinaagi sa dili makatarunganon nga pagpasaka sa presyo sa ilang mga baligya.
Nanawagan usab siya sa mga lokal nga kagamhanan (LGUs) nga hugot nga bantayan ang ilang tagsa-tagsa ka hurisdiksyon ug ipatuman ang bug-at nga silot, lakip na ang pagkansela sa business permit sa mga malapason.
Samtang sigun ni Marivic Aguilar sa DTI, ang suplay ug presyo sa mga batakang kinahanglanon (BNPCs) sa Metro Cebu ug tibuok probinsya nagpabiling lig-on ug anaa ra sulod sa Suggested Retail Price (SRP).
Gipasalig usab sa ahensya nga ang kasamtangang stocks paigo pa alang sa tulo ka bulan, busa giawhag ang publiko nga likayan ang panic buying.
