CEBU CITY – Padayon karon ang hot pursuit operation batok sa usa ka security Guard sa Cogon Cruz Integrated School sa dakbayan sa Danao kinsang maoy gitoohang responsable sa kamatayon sa usa ka 14 anyos nga dalagita nga nakaplagang patay sulod sa septic tank sa naasoy nga tunghaan kahapon sa udto, Abril 9.
Ang biktima mao si Thesa Marie Ygay, residente sa Brgy. Tabok Camaligbato samtang ang suspek mao si Jessie Montes Mediquill, 34 anyos ug residente sa Tuburan Sur, Danao City .
Matud ni PLtCol. Maribel Getigan, ang hepe sa Danao Police Station nga ang usa sa mga gwardiya sa sa maong tunghaan maoy gitudlo nila nga suspek sanglit mao matud pa kini ang katapusang kauban sa biktima sa wala pa kini nawala.
Basi sa ilang inisyal nga imbestigasyon, niadtong Sabado, miduol sa Danao City PS ang igsuon sa biktima human nga dunay nakitang mga lama sa dugo sa guard house sa tunghaan kung asa nag trabaho ang suspek.
Dali matud pa nga gipa imbestigahan ni Getigan sa iyang mga sakop ang mga nakitang dugo ug gipapangita dayon ang biktima ug ang suspek.
Kagahapon sa udto , usa ka uitility worker matud pa ang nakabantay sa baho nga naggikan sa septic tank luyo sa maong eskwelahan ug sa ilang pagsusi, nakita ang nag utaw-utaw nga lawas sa biktima.
Duna kini mga samad sa iyahang lawas apan susihon pa kung unsa ang nakasamad ini.Pagtuo ni Getigan nga gipatay daan ang bitima sa wala pa kini gilabay sa septic tank.
Nasuta usab sa kapulisan nga sukad nag edad pa og 9 anyos ang biktima, nangulitawo na niini ang suspek. Matud ni Getigan nga ang suspek usab ang naggasto sa pag tungha sa biktima ug hatagan usab niini ang biktima kung unsay mga kinahanglanon niini.Kanunay usab matud pa kining makita sa guard house sa higayon nga naa nagtrabaho ang suspek.
