CENTRAL VISAYAS- Moabot sa 157 ka mga ilegal nga armas ang nasakmit sa Police Regional Office (PRO) 7 sa nagkadaiyang operasyon nga gihimo sa tibuok buwan sa Agosto.
Sa nasangpit nga gidaghanon, 116 ang nasakmit pinaagi sa mga tubag sa kapulisan, 21 pinaagi sa Search Warrants, 18 pinaagi sa buy-bust operations ug 2 atol sa serbisyo sa warrants of arrest.
Dugang niini, unom ka pabuto ug 385 ka lain-laing klase sa bala ang nasakmit sa mga otoridad.
Anaa usab sa unom ka mga ilegal nga armas ang boluntaryong gitugyan ubos sa OPLAN Katok, usa ka programa sa PNP nga nagtumong sa pagtuktok sa mga pultahan sa mga rehistradong tag-iya sa armas aron pagpahinumdom kanila sa pag-ayo o pag-renew sa ilang mga lisensya, ug kung dili, boluntaryong itugyan ang ilang mga armas.
Sa laing bahin, pito pa ka wala marehistro nga armas ang gi-surrender sa mga sibilyan sa mga police station.
Mokabat sa 92 ka tawo ang gidakop ug gipasakaan og kaso sa paglapas sa Republic Act No. 10591 o Comprehensive Firearms and Ammunition Regulation Act of the Philippines, nga nagdili sa ilegal nga paghupot, paggamit, ug pagbaligya sa mga armas ug mga bala.
Gitataw ni PBGEN Redrico A Maranan, Regional Director sa PRO7, nga dili mohunong ang kapolisan sa paggukod sa mga indibidwal nga padayong nagtago o nagmintinar sa ilegal nga armas.
