Naka-promote og 16,025 ka mga magtutudlo karong tuiga ang Department of Education ubos sa pagpangu ni Secretary Sonny Angara.
Sumala sa DepEd, 41,183 pa ka mga magtutudlo ang naproseso na ug gikatakdang isumite sa Department of Budget and Management para sa sunod nga batch sa mga promosyon.
Kini nga lakang kabahin sa Expanded Career Progression system nga gipatuman ubos sa administrasyon ni Presidente Ferdinand Marcos Jr. aron masiguro nga ang mga magtutudlo makasinati og pag-uswag samtang anaa pa sa aktibong serbisyo.
Gani, usa sa mga benepisyaryo mao si Claire Eusebio gikan sa Tabuk City kinsa na-promote gikan sa Teacher III ngadto sa Teacher VI human sa 21 ka tuig nga pagtudlo.
Gipahayag ni Angara nga ang reporma nagtumong sa pagtangtang sa mga babag sa promosyon ug paghatag og bili sa dedikasyon sa mga magtutudlo.
Sa kinatibuk-an, liboan ka mga magtutudlo sa tibuok nasud ang makabenepisyo niini nga sistema nga nagtumong sa pagpalig-on sa ilang propesyonal nga kalamboan.
