CEBU – Gitaho sa Philippine Coast Guard (PCG) nga aacounted na ang tanang 165 ka mga pasahero ug tripulante sa nasunog ug nalunod nga passenger vessel MBCA Mama Mary Chloe sa Pres. Carlos P. Garcia, Bohol.
Matod sa PCG, naluwas usab kagahapon ang nag-inusarang pasahero nga unang gikatahong missing dihang nasunog ug nalunod ang motorbanca.
Gipasabot sa PCG nga daling mibiya ang indibidwal nga giilang si Andy Toniaco, residente sa Brgy San Juan, Hilongos, Leyte dihang nahitabo ang insidente tungod sa trauma apan matud niya apil siya sa narescue.
Matod sa PCG, 135 sa 164 ka survivors, lakip si Toniaco, luwas nga nakauli sa ilang mga panimalay.
Padayon pang gipaubo sa pagdumala sa local governemnt unit ang nahibiling 29 ka survivor sa lungsod sa Pres Carlos P. Garcia alang sa medikal nga pagtagad.
Subo lang, namatay sa insidente ang pasahero nga giilang si Adolfo Ranola, 53, taga Brgy Poblacion Trinidad, Bohol.
Sa pagkakaron, wala pa masubay sa PCG ang ugat sa sunog sa motorbanca sa wala pa kini malunod.
