Nagpahayag og kabalaka ang usa ka election watchdog convenor kabahin sa desisyon sa Commission on Elections (Comelec) sa isyu sa giingong wala pagdeklara sa campaign funds sa kandidato ni Sen.Rodante Marcoleta.
Sa pakighinabi sa Bombo Radyo, matud ni Danilo Arao, propesor sa Polytechnic University of the Philippines ug convenor sa Kontra Daya, nga makapatingala ang maong desisyon ilabi na nga adunay mokabat sa 75 milyones pesos nga donasyon gikan sa tulo ka donor nga giingong napahimuslan sa kandidato.
Matud niya, bisan pa og nahatag ang kwarta sa dili pa ang campaign period, obligasyon gihapon kini nga ideklara sa SOCE.
Gipasabot ni Arao nga ang wala pag-apil sa maong kantidad nagpasabot og dili matuod nga deklarasyon nga unta adunay dako nga tulugabon.
Nipasidaan usab kini nga posible kini mahimong “playbook” sa ubang mga kandidato sa umaabot, ilabi na sa 2028 presidential elections diin mas dako ang kuwarta nga magamit.
Dugang pa, nga posible kini nga sundon sa uban ang maong pamaagi—pinaagi sa pagpaagi sa donasyon sa dili pa ang campaign period aron malikayan ang disclosure.
Nanawagan usab siya sa komisyon nga maghatag og update isip kabahin sa transparency ug accountability sa publiko.
