TALISAY CITY,CEBU- Naluwas ang usa ka batang lalaki nga nag-edad og 2-anyos sa mga sakop sa City of Talisay – Traffic Operations and Development Authority (CT-TODA) ug sa mga emergency responder, human aksidenteng na-lock sulod sa usa ka nakaparada nga sakyanan sulod sa 10 minutos didto sa Barangay Tabunok, Dakbayan sa Talisay, pasado alas 2 sa hapon niadtong Biyernes, Nobyembre 20, 2026.
Sa pakighinabi sa Bombo Radyo Cebu kang Joy Tumulak, ang pangulo sa CT-TODA, gibutyag niini nga naglingkod ang bata sa luyo sa sakyanan uban sa iyang amahan sa dihang migawas ang amahan ug kalit nga na-lock ang mga pultahan niini.
Taliwala sa mga paningkamot, wala na maablihi sa amahan ang sakyanan.
Dali siyang nangayo og tabang kang Traffic Enforcer Eric Alo, kinsa nagpahibalo dayon sa Command Center, lakip na sa Disaster Office ug sa Talisay Bureau of Fire Protection.
Uban sa tabang sa laing traffic enforcer nga si Joey Tan ug sa usa ka store employee, gigamit sa mga rescuer ang usa ka fire extinguisher aron buakon ang bintana sa sakyanan ug dali nga naluwas ang bata.
Gipahinumdoman usab ni Tumulak ang mga ginikanan nga adunay sakyanan nga magpabiling alerto alang sa kaluwasan sa ilang pamilya ug likayan ang pagpasagad o pagbiya sa mga bata sulod sa sakyanan.











