Namatay ang usa ka drayber sa motorsiklo human gikatahong nabangga sa usa ka passenger van sa Sitio Tangob, Barangay Lagtang, Dakbayan sa Talisay, sa alas 9:56 sa gabii niadtong Lunes, Pebrero 2.
Subay sa inisyal nga imbestigasyon, ang rider niovertake sa usa ka tricycle sa dihang ningsulod kini sa pikas lane ug nibangga sa nagsingabot nga van.
Ang biktima giila nga si alyas “James”- 30 anyos ang pangidaron, taga Kampo 6 sa bukirang bahin sa Dakbayan sa Talisay.
Sa gikabutyag ni Joy Tumulak, ang head sa City of Talisay Traffic Operations & Development Authority (CT-TODA) atol sa na ekslusibong pakighinabi sa Bombo Radyo Cebu newsteam kaniya, ang maong biktima padung kini sa Kampo 6, ug gagikan kini sa Tabunok, Talisay, samtang ang vhire gikan sa bukid ug padulhog kini sa Tabunok.
Apan pag abot na sa nahitaboan sa disgrasya, gikabutyag sa mga saksi nga dinaliang nag overtake kini si alyas “James,” apan sa iyang pag overtake naabot kini siya sa nagsingabot nga vhire.
Atol sa maong panghitabo, daling miresponde ang sakop sa CT-TODA samtang ang biktima naligo pa sa kaugalingong dugo, hinungdan nga dali kining gidala sa balay tambalanan.
Apan, bisan paman daling nadala ang biktima sa Cebu South Medical Center (CSMC) gideklarar kini gihapon kini nga dead on arrival.
Samtang, gitataw usab ni Tumulak, nga ang driver sa maong vhire anaa pa sa ilang buhatan, ug nagpabilin og unsa ang desisyon sa pamilya kon pasakaan ba kini og kaso.
