Gipatawag sa Cebu Provincial Board ang mga pet crematorium operators sa Sugbo human sa kontrobersiya sa Bulacan, diin 29 ka iro ug iring nga gitugyan unta para i-cremate nakit-an nga gilabay ra sa usa ka bakanteng lote sa San Jose del Monte.
Ang mga representante sa Golden Haven Pet Crematorium, Cebu Pet Aquamation, ug Paws Heaven Pet Cremation nagpahibalo sa board niadtong Lunes, Nobyembre 16, nga gihimo nila ang serbisyo diha sa ilang kaugalingong mga pasilidad sa Talamban, Tisa-Labangon, ug Kalunasan, Dakbayan sa Sugbo, ug wala nila kini gipabuhat sa uban.
Matod usab sa Paws Heaven, wala silay gihimo nga “communal cremation” (pag-cremate sa daghang binuhi nga dungan), gitugotan nila ang mga tag-iya nga magpabilin ug motan-aw sa pipila ka bahin sa proseso, ug naghatag usab sila og video sa pagbutang sa binuhi ngadto sa sulod sa cremation chamber.
Gihimug-atan ni Board Member Malcolm Sanchez, nga tumong sa maong pagpatawag aron matubag ang mga pangutana, hilabi na maykalabot sa proseso sa pag-cremate sa mga pets.
Atol sa iyang mensahe iyang gihimug-atan ang dakong role sa mga pets sa kinabuhi sa mga tawo, o sa mga pet-owners, hinungdan nga mas maayu nga masayud usab ang publiko sa pamaagi sa pet crematorium operators diri sa Sugbo.
Giangkon usab sa Provincial Veterinary Office nga adunay kakulang sa mga sumbanan niini lakip na nga wala kini piho nga mga lagda alang sa mga pasilidad sa pag-cremate sa mga binuhi, sanglit ang mga gihisgotan naglihok sulod sa Siyudad sa Sugbo.











