Miabot sa 439 ka indibidwal ang nagparehistro sa unang adlaw sa pagsugod sa voter’s registration sa duha ka distrito sa dakbayan sa Sugbo niadtong Martes, Nobyembre 10, 2026.
Base sa datos sa Commission on Elections o Comelec Cebu City, mas daghan ang mga nagparehistro nga nagpa-transfer gikan sa laing lungsod o siyudad padulong sa Cebu City.
Ikaduha sa pinakadaghan ang mga new registrants o kadtong unang higayon pa lamang nga magparehistro, gisundan sa mga nagpa-reactivate sa ilang mga pangalan sa listahan sa mga botante.
Sa maong ihap, 174 ang nagparehistro sa North District, samtang 264 ang natala sa South District.
Matud ni Election Officer III Bong Abilar sa Comelec Cebu City, wala sila magtakda og target nga gidaghanon sa mga botante nga ilang marehistro alang sa umaabot nga eleksyon. Hinuon, gilauman nila nga maapil sa listahan ang tanang kwalipikadong botante.
Gibutyag usab ni Abilar nga ang voter’s registration ipahigayon gikan Martes hangtod Sabado. Walay regular nga operasyon ang ilang mga opisina matag Lunes tungod kay magpatuman sila og work-from-home arrangement.
Samtang, aron mas mapaduol ang serbisyo ngadto sa publiko, magbutang og satellite registration office ang Comelec North District sa Abellana Gymnasium sa Barangay Luz matag Sabado.
Alang sa mga first-time registrants, gikinahanglan ang pagpresentar og valid government-issued identification card alang sa pag-validate sa ilang pagkatawo.
Mahimo usab nga gamiton ang school ID o birth certificate. Alang sa mga walay mapresentar nga valid identification, kinahanglan sila og sworn statement gikan sa usa ka rehistradong botante nga mopamatuod sa ilang identidad ubos sa panumpa.
Dugang pa ni Abilar, giawhag niya ang mga kwalipikadong botante nga pahimuslan ang kasamtangang kahimtang diin wala pa kaayo’y taas nga linya sa duha ka buhatan sa Comelec Cebu City.
Gipahinumdoman usab ang publiko nga siguruhong kompleto ang mga gikinahanglang dokumento sa dili pa mobisita aron mas paspas ang proseso sa ilang pagparehistro.
