Gipadangat sa Commission on Elections (COMELEC) ang ilang kinasingkasing nga pasalamat ug pagdayeg sa mga botante sa Bangsamoro tungod sa ilang determinasyon nga makabotar sa unang Bangsamoro Parliamentary Elections 2026.
Matod ni COMELEC Chairman George Erwin Garcia, gidayeg sa ahensya ang mga lumulupyo sa Bangsamoro Autonomous Region in Muslim Mindanao (BARMM) nga wala magpadala sa kahadlok aron makapili sa modumala sa bag-ong Parlamento.
Gipahayag ni Garcia nga samtang nagpadayon pa ang transmission sa mga resulta sa ubang dapit, klarong gipakita sa katawhang Bangsamoro ang kamahinungdanon sa ilang partisipasyon niining makasaysayanong eleksyon.
Gipasalamatan usab sa Komisyon ang koordinasyon tali sa COMELEC, Philippine National Police (PNP), ug Armed Forces of the Philippines (AFP) nga nagmintinar sa kalinaw sa kadaghanang bahin sa rehiyon.
Apan hugot nga gikondena sa COMELEC ang mga nahitabong kapintasan ug kagubot sa pipila ka lugar nga miresulta sa pagkaangol ug pagkasawi sa pipila ka indibidwal.
Gipasiugda ni Garcia nga kinahanglang manubag sa balaod ang mga responsable sa maong mga krimen.
Nanawagan usab ang head sa COMELEC sa mga nidaog nga kandidato nga maghiusa, tumanon ang ilang mga saad, ug ipadayon ang pagsulong sa proseso sa kalinaw sa rehiyon.
