Gibawi sa Commission on Elections (COMELEC) ang accreditation sa 50 ka mga party-list group tungod sa pagkapakyas niini sa pagtuman sa mga rekisitos may kalabotan sa partisipasyon ug sa gikinahanglang gidaghanon sa boto ubos sa party-list system.
Pormal nga gipatuman sa ahensya sa piniliay nga mga pagkansela pinaagi sa Resolution No. 11281, nga gipagawas niadtong Oktubre 15. Naglakip sa mga organisasyon ug koalisyon nga wala nakaapil sa duha ka sunod-sunod nga piniliay, o wala nakakuha og igong gidaghanon sa boto aron makakuha og pwesto sa Kongreso.
Diin napulo ka grupo ang nailhan nga hingpit nga wala nakaapil sa miaging duha ka piniliay.
Lakip sa laing 40 ka grupo kansang mga rehistrasyon gikanselar usab mao ang pipila ka iladong mga organisasyon, sama sa Bayan Muna, Magdalo Para Sa Pilipino, Buhay Hayaan Yumabong (BUHAY), Rebolusyonaryong Alyansang Makabansa (RAM), ug ang BOSES party-list (kanhi MOCHA).
Ang lakang sa COMELEC gibasi sa Republic Act No. 7941, o ang Party-List System Act, ug sa COMELEC Resolution No. 11204.
Ubos sa Seksyon 6(8) sa maong balaod, ang COMELEC adunay awtoridad—human sa tukmang pagpahibalo ug pagpahigayon og pagdungog—nga kanselahon ang rehistrasyon sa bisan unsang grupo nga napakyas sa pag-apil sa miaging duha ka piniliay o napakyas sa pagkuha sa gikinahanglang porsyento sa mga boto.
