-- ADVERTISEMENT --

Gisaway ni John Ruiz III, ang tigpamaba sa Bayan Muna Central Visayas, ang paggamit sa kampo sa depensa og mga video clips sa mga namatay nang personalidad atol sa impeachment proceedings batok kang Bise Presidente Sara Duterte, ug gihulagway kini isip taktika aron langayon ang pagdungog ug mangayo og simpatiya sa publiko.

Sumala ni Ruiz, bisan pa man og politikal ug legal ang kinaiyahan sa impeachment, angayang magpunting ang proseso sa mga ebidensya ug kamatuoran imbes nga modangop sa emosyon sa katawhan aron ipakita nga makaluluoy ang bise presidente.

Gihisgutan ni Ruiz ang pagpasalida sa mga video clips nila ni anhing Senador Miriam Defensor-Santiago ug anhing Chief Justice Renato Corona, diin giingon niya nga gigamit kini nga out of context aron tabunan ang giingong kakuwang sa ebidensya sa depensa nga makakontra sa mga gipresentar sa prosekusyon, ilabi na sa analysis ni Atty. Cabrera.

Dugang pa sa tigpamaba, klaro matud pa nga adunay mga senator-judges nga nagpakita og pagpabor ug nag-drama sa maong pagdungog. Inay gisuportahan ni Ruiz ang pamahayag ni Senate President Francis “Chiz” Escudero, ang presiding officer, nga bisan pa sa mga giingong pamaagi kaniadto, nakonbikto gihapon si Corona.

Busa, nanawagan ang Bayan Muna Central Visayas og tulubagon ug hustisya, dungan sa pag-awhag nga ikonbikto si Bise Presidente Duterte basi sa igong basihanan ug ebidensya.

-- ADVERTISEMENT --