Andam ang Commission on Elections (Comelec) sa bisan unsang desisyon sa Korte Suprema bahin sa petisyon nga nag-kuwestiyon sa pagpalangan sa Barangay ug Sangguniang Kabataan Elections (BSKE).
Matud ni Comelec Chairman George Garcia, bisan unsa ang ipagawas nga mando sa Korte Suprema, andam ang Comelec sa aspeto sa operasyon ug badyet.
Gipahunong na sa Comelec ang mga kalihokan nga may kalabotan sa BSKE human mahimong epektibo ang balaod nga nagpalangan sa eleksyon ngadto sa 2028.
Samtang, kapin P8 bilyon na ang nagasto sa Comelec alang sa pagpangandam sa BSKE, lakip ang mga ekipo, balota ug manpower.
Kadaghanan sa mga ekipo ug suplay mahimo gihapong magamit sa umaabot nga eleksyon kon husto ang pagtipig niini.
Ang nahibiling pondo alang sa BSKE mahimong magamit sa pagpangandam sa 2028 elections.
Samtang, ang gisugyot nga badyet sa Comelec alang sa 2027 mokabat sa P29.5 bilyon, nga 46 porsyentong mas taas kumpara sa miaging alokasyon.
