Gipahigayon sa Commission on Elections (Comelec) ang katapusang testing ug ang pag-seal sa mga automated counting machine sa Mindanao isip kabahin sa katapusang mga pagpangandam alang sa makasaysayanong eleksyon sa parlamento sa Bangsamoro Autonomous Region in Muslim Mindanao (BARMM).
Personal nga nasaksihan ni Comelec Chairman George Garcia ang pagsulay ug pag-seal sa mga makina sa Cotabato City Institute sa Cotabato City, usa sa mga gitudlo nga polling center.
Gihimo kini nga proseso aron masiguro ang hingpit nga pagpangandam, ingon man ang luwas, hapsay, ug matinud-anon nga pagpahigayon sa eleksyon karong Setyembre 14.
Samtang, ang mga personahe sa kapulisan nag-standby sa Dalican Pilot Elementary School sa Datu Odin Sinsuat, Maguindanao del Norte, samtang nagpaabot sa pag-abot sa mga makina nga gamiton.
Sumala sa administrasyon sa Dalican Pilot Elementary School, anaa sa 16 ka mga classroom ang magsilbing polling place, diin ang matag lawak adunay usa ka automated counting machine.
Sa laing bahin, gipataas sa Philippine National Police ang alert status ngadto sa “full alert” sa tibuok rehiyon sa BARMM aron masiguro ang kalinaw ug seguridad atol sa unang eleksyon sa parlamento sa maong lugar.
