Niabot na sa kategoryang “Very Strong” ang nasinati nga El Niño phenomenon karon, ug posibleng malabwan pa niini ang mga pinakakusog nga El Niño sa kasaysayan, sumala ni Engr. Alfredo Quiblat Jr., ang Chief sa PAGASA Visayas Regional Services Division.
Sa iyang pahayag, gipasabot ni Quiblat nga adunay upat ka kategorya ang intensity sa El Niño: weak, moderate, strong, ug very strong, ug matod niya, ang kasamtangang El Niño nitupong na sa mga makasaysayanong very strong El Niño nga nasinati niadtong 1982–1983, 1997–1998, ug 2015–2016.
Basi sa datos, ang abnormal nga kainiton sa sentro ug silangang bahin sa Kadagatang Pasipiko miabot na og 2.3 degrees Celsius nga mas taas kon itandi sa normal nga temperatura—sama sa natala sa maong mga milabay nga katuigan.
Apan, nipasidaan ang opisyal nga basi sa mga forecast sa mga international prediction centers ug sa World Meteorological Organization (WMO), posibleng mao na kini ang pinakakusog nga El Niño nga masinati. Ingon man nga gituohan nga mosobra pa sa 2.3 degrees Celsius ug posibleng moabot hangtod sa 3 degrees Celsius ang sea surface temperature anomaly niini.
Gikanayon usab ni Quiblat, ang mga bag-ong datos nagpakita nga ang grabeng pag-init sa kadagatan miabot na sa gilawmon nga 150 metros gikan sa ibabaw paingon sa ilawom. Kini usa ka timailhan nga wala pa sa iyang peak ang kasamtangang El Niño.
Inay gipaabot niini ang pinakakusog nga lebel sa dili pa matapos ang tuig, ug tungod sa kakusog sa kainit sa ilawom sa dagat, gilauman nga magdugay pa ang epekto sa maong El Niño hangtod sa Hunyo o sa unang bahin sa tuig 2027.
