CENTRAL VISAYAS- Gipadayag sa usa ka propesor sa Polytechnic University of the Philippines nga dili angay dayon i-konektar nga ang tanang aktibista, mamamahayag, ug mga researcher nga makita sa mga kabukiran nalambigit na sa armadong kalihukan, ilabi na sa kahimtang sa kontrobersyal nga engkwentro sa Toboso, Negros Occidental nga miresulta sa kamatayon sa 19 ka tawo.
Sa pakighinabi sa Bombo News Team, gipasiugda ni Prop. Danilo Arao, convenor sa Kontra Daya, nga sayop ang awtomatikong pagtuo nga kon ang usa ka indibidwal makita sa usa ka conflict area, miyembro na dayon kini sa rebeldeng grupo.
Gipunto niya nga ang aktibismo usa ka lehitimong pamaagi sa pag-apil ug pagbarog sa mga isyu sa katilingban, ug dili kini angay iparehas sa armadong pakigbisog.
Gipunting usab niya nga ang presensya sa mga estudyante, mamamahayag, social workers, ug researchers sa mga hilit nga lugar kasagarang may kalabutan sa ilang propesyonal nga buluhaton sama sa research, immersion, ug community engagement ug wala kini nagpasabot nga sila nalambigit sa armadong grupo.
Sa laing bahin, mipadayag si Arao og panawagan alang sa usa ka independente ug patas nga imbestigasyon aron hingpit nga masuta ang tinuod nga nahitabo sa insidente.
Giingon niya nga dili angay ibase lamang sa opisyal nga pahayag sa mga otoridad ang paghatag og hukom, ilabi na kung adunay kasaysayan sa mga alegasyon sa human rights violations ug mga kontrobersyal nga operasyon.
Sumala pa kaniya, mas angay tutokan ang mas dako nga hulagway sa sitwasyon, dili lang kung nganong anaa ang pipila ka indibidwal sa kabukiran, kondili ang kinatibuk-ang kahimtang sa lugar ug ang mga panghitabo sa wala pa ug samtang nagpadayon ang operasyon.
Nag-awhag si Arao sa publiko nga magpabiling mabinantayon sa kamatuoran, magbase sa ebidensya, ug likayan ang dali nga paghukom o pagbutang og label sa mga nalambigit sa insidente, samtang nagpadayon ang panawagan alang sa mas lalom ug patas nga imbestigasyon.
