LAPU-LAPU CITY – Gipaubos sa ‘surprise drug test’ ang 169 ka mga empleyado sa nagkadaiyahang buhatan sa Lapu-Lapu City Hall.
Gipahibalo ni Gary Lao, ang head sa City of Lapu-Lapu Office of Substance Abuse Prevention (C-LOSAP), nga sukad sa buwan sa Hulyo ning kasamtangan nga tuig hangtud niining adlawa, mikabat na sa 17 ka mga opisina sa City Hall ang ilahang napaubos sa drug test.
Karung adlawa giingong wala may mi-eskapo apan adunay pito ka empleyado ang ‘absent’ hinungdan nga wala kini malakip sa drug testing.
Nagkanayon si Lao nga magpadayon ang ilahang pagpahigayon ug drug test ug gisiguro nga ilaha kining gi-monitor ilabi na ang mga empleyado sa gobyerno.
Sunod semana masayran kung aduna ba’y nagpositibo sa 169 ka mga empleyado nga gipaubos sa drug test karung adlawa.
