Nasikop sa mga ahente sa National Bureau of Investigation (NBI) ang anaa sa 17 ka mga Taiwanese Nationals kansang giingong nga mga fugitives didto sa Paseo Yvette, Maria Luisa Estate, Barangay Banilad ning dakbayan sa Sugbo niadtong Huwebes, May 15, 2025.
Gilusad ang maong operasyon sa Special Task Force – Cybercrime Division sa NBI nga nanukad sa hangyo gikan sa Naval Intelligence and Security Group sa Taiwan nga gi-relay sa Taipei Economic and Cultural Office sa Pilipinas.
Matod pa sa NBI nga 6 sa mga dinakpan nga nagtago-tago diri sa Sugbo kay mga miyembro sa Four Seas Gang sa Taiwan diin ang mga warrant of arrest nga gi-isyu sa Branch 63 – Regional Trial Court sa Tarlac City ang nakapadakop kanila.
Sa maong operasyon, nadiskobrehan sa mga operatiba nga ang mga suspek kay nagpadagan og “love scam” gamit ang mga makinarya niini sama sa scripts ug spiels aron makabitik og mga biktima.
Sa pakighinabi sa media niadtong Biyernes, Mayo 16 sa NBI pinaagi ni Atty. Van Angluben, ang Executive Officer sa NBI Special Task Force – Cybercrime Division nga posibleng kabahin kini sa POGO hub ang pag-operate sa mga dinakpan apan ilang specialty mao kining love scam kung diin mabata o tiguwang wala silay pilion nga biktima aron pangwartaan.
Ang mga awtoridad gikan sa kaulohan ang naka-track down sa grupo human ang usa ka sakop sa mga grupo kay adunay outstanding warrant kay nag-book kini og flight gikan sa Manila padulong sa Sugbo.
Nakuha sa maong raid ang 17 ka mga computers, 23 ka mga smartphones, 2 ka crypto wallets nga magsilbing ebidensya batok sa mga dinakpan.
Kasamtangang nakabalhog karon sa NBI Central Visayas Regional Office ang mga langyaw nga dinakpan samtang nagpaabot sa pagproseso sa ilang mga kaso.
