Nagpagawas ang Las Piñas Regional Trial Court (RTC) og warrant of arrest batok sa 18 ka kanhing bodyguard sa kanhing kongresista nga si Zaldy Co, o mas nailhan nga “maleta boys.”
Ang nag-isyu sa maong arrest warrant mao si Judge Kathryn Sabado, ug kini may kalabotan sa upat (4) ka ihap sa perjury nga giatubang sa matag usa niini.
Diin, ang matag ihap sa perjury adunay piyansa nga P18,000, busa ang mga bodyguard adunay kinatibuk-ang piyansa nga P72,000 alang sa ilahang temporaryong kagawasan.
Ang mga kanhing bodyguard naglambigit sa daghang mga personalidad sa iskandalo sa pagkontrol sa baha, diin daghan sa mga akusado ang mihimakak sa mga alegasyon ug nagpasaka og mga kaso sa perjury isip baylo.
Samtang ang warrant of arrest batok sa 18 ka kanhing bodyguard naggikan sa mga kaso nga gisang-at nila ni House lawmaker Leila de Lima, kanhing senador Sonny Trillanes IV, kanhing National Security Adviser Eduardo Año, ug Bureau of Corrections Director General Gregorio Pio Catapang Jr.
Diin, ang warrant of arrest gi-isyu niadtong Martes, ug ang abogado sa kanhing bodyguard nga si Levito Baligod nagsang-at og mosyon aron pakunhuran ang piyansa niadtong Miyerkules.
Nag-ingun usab si Atty. Levito Baligod nga 14 na lang sa 18 ka kanhing bodyguard nga nag-atubang og mga kaso ang iyang girepresentahan, kini tungod kay matod pa niya, ang upat nga
wala niya girepresentahan mibawi na sa ilang mga pamahayag.
