Kusganong gihimakak sa kanhi House Speaker ug Leyte Representative Martin Romualdez ang pasangil sa Ombudsman nga siya ang nagpaluyo sa pagbawi sa mga affidavit sa pipila ka kanhi bodyguard sa kanhi Ako Bicol Party Representative Zaldy Co.
Sa usa ka pamahayag, si Romualdez miingon nga ang akusasyon dili tinuod ug giinsister nga kini nagpakita lamang sa giingong pagpanghasi batok kaniya.
Miingon siya nga ang pagbawi sa mga “maleta boys” sa ilang mga pahayag nagpamatuod lamang nga ang mga pasangil batok kaniya nga naglambigit kaniya sa mga anomaliya sa pagkontrol sa baha bakak ug hinimo-himo.
Dugang pa sa kongresista nga andam siya nga atubangon ang tanang mga pasangil ug pamatud-an ang iyang pagka-inosente.
“I will not be intimidated. I will face every accusation against me, defend myself with the facts, the evidence, and the truth,”matod ni Romualdez.
Samtang, si Ombudsman Jesus Crispin Remulla miingon nga adunay pipila ka kanhi bodyguard nga mibawi sa ilang nangaging mga testimonya mahimong mag-atubang og mga kaso.
Sumala kaniya, ang mga korte dili pabor sa pagbawi sa mga affidavit, labi na kung ang mga saksi naghatag og lain-laing mga asoy.
Gidugang usab nga ang mga kanhing security personnel mahimong iapil sa mga akusado kung dili na sila magsilbing mga saksi sa nagpadayon nga imbestigasyon.
Sa karon, ang Office of the Ombudsman nagpadayon sa pag-imbestiga sa mga reklamo sa plunder, graft, ug direct bribery nga gisang-at batok kang Romualdez kalabot sa giingong pagdawat og kwarta gikan sa flood control scandal.
