Nadakpan sa mga awtoridad sa Lipa, Batangas ang usa ka 19-anyos nga estudyante sa kolehiyo human kini nagpakaaron-ingnun nga gikidnap aron makapangayo og kwarta sa iyang kaugalingong mga ginikanan.
Subay sa report, nakadawat og mensahe sa social media ang inahan sa suspek nga nangayo og P300,000 nga ransom baylo sa kagawasan sa iyang anak.
Gihatagan pa gani sila og duha ra ka oras nga palugit para ideposito o ihatag ang maong kantidad.
Aron mas tuohan ang iyang drama, nagpadala pa ang estudyante og video diin makit-an siyang naghilak, lakip na ang usa ka video diin daw nagbilin kini og katapusang mensahe para sa iyang pamilya.
Apan pinaagi sa gihimong backtracking sa kapulisan, natultolan ang suspek nga nag-inusara ra diay sulod sa usa ka hotel.
Dihang nasakpan, miangkon ra usab ang estudyante nga tumong ra niya ang maong pagpangilad aron makakuha og kwarta nga ipambayad sa iyang utang sa sugal.
Tanggong karon ang suspek ug mag-atubang og haom nga kasong ipasaka batok kaniya.
