Nakaapekto sa mga costumer sa usa ka resort ug mga residente diin adunay 20 ka mga inidbidwal ang naapektohan sa maong chemical leak, ug adunay 19 usab niini ang gidala sa tambalanan gumikan sa kalisod sa pag ginhawa nga nasiati niini gahapon sa gabii, Setyembre 2, 2025.
Apan, sa wala madugay, hingpit ra nga na-clear sa mga sakop sa Bureau of Fire Protection pasado alas 10 sa gabii, ug nahitabo ang alarma sa chemical leak sa Sitio Purok Cainta III, Brgy. Pooc, Dakbayan sa Talisay.
Sa pakighinabi sa Bombo Radyo team kang F C/INSP Glory Ann Bicoy, Talisay City Fire Marshal, nakadawat ang ilang opisina mahitungod sa report sa usa ka pagbuto sa usa ka chemical mixture nga gikatahong naglambigit sa kemikal nga chlorine ang dali nga nialisngaw sa palibot sa mao nga resort ug niresulta kini sa paglisod og ginhawa sa mga naapektohan ilabi na sa 10 ka mga costumer nga nag selebrar sa usa ka birthday party duol sa swimming pool.
Busa, daling nagpahigayun og flushing operations ang BFP-7 Special Operations Unit Hazmat Squad sa mao nga resort aron sa paghinlo ug nakita pud nila ang usa ka balde nga gituohang gisudlan sa kemikal nga mibuto.
Samtang ang City of Talisay Disaster Risk Reduction and Management Office daling nag setup sa command center aron sa pagtabang sa mga naapektohan sa chemical leak.
Padayun pa ang imbestigasyon sa BFP-City of Talisay sa mao nga panghitabo samtang, ug posibleng susihon usab sa Talisay City Fire kung aduna bay mga kalapasan sa mga lagda ang mao nga resort.
