Opisyal nga gisugdan ang unang Miss Grand International All Stars (1st Edition) human sa gipahigayong “Welcome All The Stars to Bangkok & Sashing Ceremony” sa MGI Hall sa Thailand, gahapon Mayo 19, 2026.
Ang kalihokan nagsilbing opisyal nga pagsugod sa kompetisyon alang sa maong edisyon sa pageant nga naka-focus sa mga beteranang kandidata, diin 58 ka mga pambato gikan sa lain-laing nasod ang miapil.
Nasayran nga ang maong programa gi-host sa pambato sa Pilipinas nga si Miss Grand International 2024 first runner-up CJ Opiaza.
Atol sa seremonya, tagsa-tagsa nga gipaila-ila ang mga kandidata ug opisyal nga gisuotan sa ilang personalized MGI All Stars sashes nga adunay nakasulat nga mga ngalan sa ilang nasod.
Misidlak pag-ayo ang presensya sa mga representante sa Pilipinas samtang nagpakita sa ilang kompiyansa sa entablado samtang nagsul-ob sa ilang swimsuit ug gown.
Lakip sa mga delegado sa nasod mao sila si Gazini Ganados, Alexia Nuñez, Fuschia Anne Ravena, Keylyn Trajano, ug Imelda Schweighart.
Sumala sa mga nag-organisar, ang MGI All Stars usa ka espesyal nga edisyon sa pageant nga bukas alang sa mga beterana sa internasyonal nga kompetisyon sa kaanyag nga nag-edad og 20 hangtod 40 anyos nga wala pa makadaog og mga dagkong korona.
Ang maong kompetisyon magpadayon sa Thailand hangtod sa katapusang gabii sa koronasyon nga gikatakda karong Mayo 30.
