LAPU-LAPU, CEBU-Nabulabog ang giingong ‘meeting’ sa usa ka konsehal ug SK chairperson sulod sa usa ka motel sa Barangay Pajo, dakbayan sa Lapu-Lapu sa dihang gi-apas kini sa asawa sa barangay konsehal nga adunay kuyog nga mga sakop sa kapulisan.
Matud pa nga wala’y pagduha-duha nga gituktok sa Pulis ug sa asawa ang lawak sa motel ug ingon man nga wala kini mapakyas gumikan nakompirmar ang duha nga nag-uban.
Gipugngan ang ilhanan sa duha ka opisyal sa barangay gikan sa lungsod sa Consolacion aron mapanalipdan ang ilang pribasiya.
Gani, gibuhian kini gumikan wala kini nasakpang nakighilawas diin usa kini sa kinahanglanon arun maduso ang kaso bisan paman nga silang duha ra ang anaa sa lawak.
Sa habig sa konsehal nga igo lang daw nag-meeting ang duha ug gihimakak nga wala sila’y relasyon.
Gitataw usab ni Lieutenant Colonel Christian Torres, ang tigpamaba sa Lapu-Lapu City Police Office nga mamahimo gihapon pasakaan sa asawa og kaso ang iyang bana sa kasong paglapas sa Republic Act 9262 o Violation Against Women and their Children Act.
