Nagbilin og dili momenos 37 ka mga kinabuhi ang nakalas human sa nahitabong bangga tali sa duha ka mga bus nga pasaheroan sa usa ka highway sa habagatang bahin sa Bolivia samtang lakip sa namatay ang walo ka mga menor de edad.
Sumala sa taho sa kapulisan, kini ang labing grabeng aksidente sa bus sa nasod karong tuiga samtang, 41 ka samdan nga gidala sa tambalanan.
Lakip sa namatay mao ang lima ka langyaw nga taga-Peru ug usa ka tres anyos nga batang babaye nga German. Laing pito ka mga menor de edad ang lakip sa mga nangamatay.
Gikataho sa mga awtoridad, ang aksidente nahitabo sa usa ka makitid nga dalan samtang nagpaingon sa Oruro, diin gihimo ang Oruro Carnival.
Matod ni piskal Gonzalo Aparicio, ang drayber sa usa sa mga bus giingong hubog ug kusog ang pagpadagan hinungdan nga na-overshoot kini sa pikas lane sa karsada nga niresulta sa kusog nga pagbangga sa kasugat nga bus.
Diha-diha dayon gikompirmar sa usa ka opisyal nga ang usa sa mga driver nga naluwas kay nanimaho og ilimnong makahubog hinungdan nga nipahigayon sila og blood test.
