Gisang-at ang duha ka House Resolutions sa House of Representatives aron pag-ila ug pagpahalipay sa P-pop girl group nga BINI sa pagkahimong unang Filipino pop group nga nagpasundayag sa Coachella Valley Music and Arts Festival 2026.
Si Negros Occidental 3rd District Representative Javier Miguel Benitez nagsang-at og House Resolution 930 nga “commending and congratulating” sa grupo alang sa ilang makasaysayanong pasundayag sa usa sa pinakadako nga music and arts festivals sa kalibutan.
Giila usab sa resolusyon ang kontribusyon sa BINI sa pagpalambo sa talento ug kultura sa mga Pilipino sa tibuok kalibutan.
Ang P-pop group, nga gilangkuban nila ni Aiah, Colet, Maloi, Gwen, Stacey, Mikha, Jhoanna, ug Sheena, nagpasundayag sa pipila sa ilang mga hit nga kanta sama sa “Pantropiko,” “Karera,” ug “Shagidi” sa ilang high-energy debut sa festival.
Samtang, si Rachel Marguerite Del Mar nagsang-at usab og House Resolution 934 nga nag-ila dili lang sa BINI apan lakip usab si Sophia Laforteza sa Katseye alang sa ilang pasundayag sa Coachella.
Subay sa resolusyon, ang ilang kalampusan nakahatag og dungog ug pag-ila sa Pilipinas sa natad sa musika sa tibuok kalibutan.
