CEBU-Nagmalampusong ang duha ka mga Sugbuanong graduates human kini nalangkob sa topnotchers list sa bag-o lang gipagawas nga resulta sa February 2025 Mechanical Engineers Licensure Examination.
Gipagawas sa Professional Regulation Commission (PRC) ang resulta sa maong board exam para sa mga Mechanical Engineers kagabii sa adlawng Lunes, Pebrero 24, 2025.
Diin sa maong resulta nakuha ni Nico Anthony Ferenal Tejano ang number 1 rank sa rating nga 93.50% samtang si John Rey Bellita Fabre kay anaa sa ika-10 nga pwesto sa rating nga 88.90%.
Si Tejano ug Fabre kay pulos gradwado sa tunghaan sa University of Cebu nga nakabase diri sa dalan Sanciangko sa downtown Cebu City.
Mihatag sa iyang pahalipay si Ms. Candice Gotianuy, ang Chancellor sa University of Cebu pinaagi sa iyang official social media account sa kalampusang nakuha sa duha ka mga gradwado sa ilang unibersidad.
Base sa PRC nga anaa sa 3,089 gikan sa 6,318 ang nakapasar sa kasamtangang edisyon sa maong board exam para sa mga Mechanical Engineers diin nagpakita kini sa 48.89 nga passing rates sa tanang mikuha sa eksaminasyon nationwide.
