Nakalas ang 2- ka mga drayber sa motorsiklo, samtang tulo ka mga backrider ang naangol sa panagbangga sa mga sakyanan sa dalan probinsiya sa Barangay Giloctog, Barili, Sugbo niadtong Miyerkules sa gabii, Abril 22.
Giila ang mga nakalas nga sila si Edward Fernandez Cañete, 36, residente sa Barangay San Rafael, ug Celso Cabalida Caberiana, 43, taga Barangay Giloctog.
Naila usab ang mga naangol nga mao sila si Kint Vincent Mari Montemayor, 28, taga Barangay Japitan, ug Sirmel Genterone Sibala, 46, taga Barangay San Rafael. Ang duha pulos mga pasahero sa motorsiklo nga gimaniho ni Cañete.
Naangol usab si Gelmar Bayer Ogaob, 50, taga Barangay Cagay, kinsa backrider ni Caberiana.
Sa inisyal nga imbestigasyon sa Barili Municipal Police Station, nahitabo ang insidente mga alas 9:30 sa gabii, samtang ang duha ka mga motorsiklo nagbiyahe sa managlahing direksyon. Si Cañete, Montemayor, ug Sibala paingon sa Barangay Japitan, samtang sila si Caberiana ug Ogaob paingon sa Barangay Giloctog.
Matod sa kapulisan nga pag-abot sa dapit sa nahitaboan kalit nga nilusot si Caberiana sa pikas lane hinungdan nga nabangga ang nagsingabot nga motorsiklo nga gimaneho ni Cañete.
Tungod sa impact sa bangga, nakaangkog grabeng samad ang duha ka mga drayber nga maoy nakaingon sa ilang kamatayon.
Samtang sa pikas bahin, ang mga naangol nga backriders gidala sa Barili Infirmary Hospital alang sa dinaliang medikal nga pag-atiman.
Ang mga nalambigit nga motorsiklo gidala sa municipal police station alang sa tukmang disposasyon.
