CEBU CITY- Patay ang duha ka mga indibidwal, samtang upat ang kritikal human makuryentihan atol sa pagtaod sa street solar lights niadtong Enero 14, 2026 sa Nivel Hills, Barangay Lahug.
Sumala ni Police Major Eric Gingoyon, hepe sa Mabolo Police Station, ang mga biktima nagtrabaho sa usa ka pribadong kompanya ug subcontractor sa Department of Public Works and Highways (DPWH) nga maoy nagpatuman sa proyekto sa pagtaod sa mga street solar lights.
Matud pa ni Gingoyon, nagtukod og poste ang mga biktima dihang kalit nga mipilit ang poste sa live wire, hinungdan nga nakuryentihan ang kadaghanan sa mga trabahante, ug miresulta sa pagkamatay sa duha ka biktima.
Upat ka mga biktima ang kasamtangang anaa sa tambalanan ug gilaraw nga kritikal ang kahimtangan.
Gipaabot usab nga nakig-alayon na ang mga pribadong kompanya sa mga kabanay sa mga biktima aron tubagon ang mga gastusin sa tambalanan, lakip na ang mga kahikayan alang sa duha ka nakalas nga kinabuhi.
Mipahimangno usab si Major Gingoyon nga mas hugtan sa sunod ang koordinasyon tali sa mga electrician ug sa Visayan Electric Company (VECO) aron masiguro ang kaluwasan ug malikayan ang susamang mga insidente sa umaabot.
