Dili ikalimbong sa kadaghanan nga manghawod ang mga Sugboanon sa bisan unsang matang sa eksaminasyon tungod kay gawas nga daghang makapasar—makaangkon gayud og pwesto ug malakip sa top notcher.
Gani, gipamatud-an kana sa duha ka mga Sugboanon nga gawas sa garbo sa Sugbo, garbo usab sa ilahang matag tunghaan, kinsa parehong topnotcher sa April 2026 Pharmacists Licensure Examination.
Una na niana mao si Denver Miles Seno Arcelo,top 4,(94.10%), gikan sa University Of Visayas-Cebu City, samtang si Jarein Mae Astillero Cirunay, Top 6, (93.20%), ug gikan sa Southwestern University.
Subay niini, eksklusibong gikuha sa Bombo Radyo Cebu news team ang habig sa duha ka mga ngilngig nga garbo sa Sugbo.
Diin, sa nahimong pamahayag ni Cirunay, gawas nga nahimo syang emosyonal sa maayong balita, una niya nga gihangop mao ang Ginoo sa dihang nasayran niya nga Top notcher siya
Sa pikas bahin, susama ni Cirunay, gipaambit usab ni Arcelo nga aduna nay mga oportunidad nga ni abot sa iyahang habig, apan mas pilion niya sa kasamtangan ang mopahuway usa ilabi na nga anaa pa ang kakapoy sa tumang pagtuon.
Subay niini, ang duha ka mga top notchers nibutyag sa ilahang dakong pasalamat sa ilahang mga higala, pamilya, ug sa labawng makagagahom tungod ug alang sa pagtanyag kanila sa maong dakong opurtonidad ug grasya.
Gani, si Cirunay ug Arcelo sa susamang higayon, nipadangat sila og mga mensahe alang sa mga pharmacy students karon nga nangandoy usab nga makapasar o ma-topnotcher sa umaabot nga board exams.
Una niini, sa mensahe ni Cirunay, iyahang gipaambit sa mga aspiring pharmacists nga sa pagpadayon lang gayud sa panaw bisan paman sa gilaoman na nga batuon, dangug, ug lisud nga dalan nga mahimamat, basta kanunay lang nga ibaton ang pag-amping ug dili ilu-ib ang saktong pahuway nga gipangayo sa lawas ugaling makati na sa tumang kakapoy.
Samtang si Arcelo, kinsa dakong mapasalamaton sa iyahang pamilya ug higala, mipadangat usab siya og mabulokong mensahe.
Matod niya, sa mga gustong magpalampuson sa maong field, nitambag siya nga magpabiling pokus sa konsepto, ug batasanon ang pagtubag-tubag og mga pangutana.
Gawas niana, iyaha usab nga gihimug-atan nga dili angayan nga kahadlokan ang paghimo og sayup, tungod kay angay niini, matag sayup, sutaon kini og himuong pagtulun-an.
