Moabot sa 20 ka mga armas nga narehistro kang Sen. Ronald “Bato” Dela Rosa ang boluntaryong gisurender sa Philippine National Police (PNP) sa Davao City human gibawi ang iyang lisensya ug rehistro sa armas.
Ang mga armas anaa karon sa kustodiya sa Regional Civil Security Unit 11 alang sa luwas nga pagtipig.
Sumala sa PNP, ang pagbawi sa lisensya nahiuyon sa Republic Act No. 10591 o ang Comprehensive Firearms and Ammunition Regulation Act, nga nagdili sa bisan kinsa nga adunay kasong kriminal nga masilotan og sobra sa duha ka tuig sa pagpanag-iya og armas.
Base sa rekord sa PNP-Firearms and Explosives Office (FEO), si Dela Rosa adunay Type 5 License to Own and Possess Firearms (LTOPF) nga nagtugot kaniya sa pagpanag-iya og sobra sa 15 ka mga armas.
Sa kinatibuk-an, 117 ka mga armas ang narehistro sa iyang ngalan ug kini tanan gimando nga isurender.
Ang revocation order gi-isyu niadtong Mayo 26, 2026, human sa direktiba sa Department of Justice nga ipatuman ang International Criminal Court (ICC) arrest warrant batok kang Dela Rosa may kalabotan sa mga kaso sa krimen batok sa katawhan nga naggikan sa madugoon nga kampanya batok sa droga sa administrasyong Duterte.
Si Dela Rosa, kinsa nagsilbi nga PNP Chief gikan sa 2016 hangtod 2018, usa sa mga importanteng tawo nga nalambigit sa kamatayon sa liboan ka mga indibidwal sa war on drugs.
Bisan pa sa revocation, gipasalig sa PNP nga ang mga gisurender nga armas magpabilin sa ilang kustodiya alang sa hustong disposisyon.
Padayon nga gibantayan sa mga awtoridad ang sitwasyon aron masiguro ang pagsunod sa balaod ug pagmintinar sa kahusay taliwala sa mga kaso nga giatubang sa senador.
