Nagtingkagol karon sa prisohan ang 38-anyos nga lalaki human kini gidakop sa mga sakop sa kapulisan sa Danao City Police Station tungod sa ilegal nga paghimo og mga armas sa iyang gipuy-an sa Purok 3, Upper Binaliw, sa Danao City, Cebu, niadtong Setyembre 22.
Nag-atubang karon ang suspek og mga kaso sa paglapas sa Republic Act No. 10591, o ang Comprehensive Firearms and Ammunition Regulation Act.
Una niini, nakadawat og impormasyon ang Danao City Police Station bahin sa ilegal nga mga kalihokan sa suspek ug daling nagpahigayon og operasyon batok kaniya.
Atol sa operasyon, nasakpan sa kapulisan ang suspek nga naghimo og mga armas nga walay lisensya sa iyang trabahoan tupad sa usa ka punoan sa Camansi, duol sa iyang pinuy-anan.
Gipangutana sa kapulisan ang suspek kung aduna ba siyay permit alang sa iyang operasyon; apan, wala siya makapakita niini.
Nakuha usab sa kapulisan ang usa ka .38 caliber revolver, usa ka .9mm upper slide, 4 ka metal frames, usa ka magazine, pipila ka mga buhing bala, ug mga gamit sa paghimo og armas.
