Nagmalampuson ang gihimong pagpangita sa mga personahe sa Mabolo Police Station 4 human luwas nga nahibalik sa iyang pamilya ang usa ka estudyante nga nareport nga nawala kaniadtong Marso 3, 2026.
Ang inahan nga si Divina Balag Sarabosing, 52 anyos, taga Ubay, Bohol, personal nga midangop sa buhatan sa kapulisan niadtong Marso 9 aron itaho nga wala na makauli ang iyang anak nga si Jannah Balag Sarabosing, 21 anyos.
Subay sa gihimong imbestigasyon, katapusang nakit-an ang maong estudyante sa CCTV footage sa luyong bahin sa University of Southern Philippines Foundation niadtong udto sa Marso 3 samtang naglakaw palayo sa tulunghaan.
Wala na usab kini ma-contact sa iyang cellphone hinungdan nga daling naglusad og follow-up operation ug koordinasyon ang mga otoridad sa Mabolo Police Station 4 aron matultolan ang nahimutangan sa biktima.
Pinaagi sa walay hunong nga pagpaningkamot sa mga imbestigador, nakigkomunikar ra ang maong estudyante sa iyang pamilya niadtong Marso 13 ug gipasalig nga siya anaa sa luwas nga kahimtang.
Hingpit siyang nahiusa pag-usab sa iyang mga kabanay niadtong Marso 14, 2026, nga naghatag og dakong kahupayan sa pamilyang Sarabosing.
Subay niini, gidayeg sa Station Commander sa Mabolo Police Station 4 ang iyang mga sakop sa ilang dedikasyon sa trabaho, ug gipahinumdoman usab sa Philippine National Police (PNP) ang publiko nga importante ang dinaliang pagtaho sa susamang mga insidente ngadto sa labing duol nga estasyon sa pulis aron mahatagan dayon og saktong aksyon.
