ISRAEL-HEZBOLLAH, WAR- Nanawagan ang Estados Unidos ug 10 ka ubang mga kaalyado nga nasud alang sa usa ka 21 ka adlaw nga ceasefire duol sa utlanan tali sa Israel ug Hezbollah sa Lebanon.
Kini aron mapugngan ang pag-ulbo sa usa ka dako nga gubat sa rehiyon sa Middle east.
Daghan pa ang mga nasud nga nanawagan alang sa de-escalation human gipahibalo sa militar sa Israel nga nangandam sila alang sa usa ka posible nga pag-atake sa yuta sa Lebanon ug giawhag ang ilang 2 ka reserve brigade alang sa mga misyon ug operasyon sa amihanang sektor.
Samtang ang mga diplomat ug mga lider sa kalibutan nagpundok sa New York alang sa United Nations General Assembly alang sa diplomatikong mga pakigpulong aron mahunong ang panagbangi sa Middle East.
Gilauman nga karung adlawa Biyernes, ang Israeli PM Benjamin Netanyahu mamulong sa UN General Assembly, kinsa mibiya sa Israel niadtong Huwebes sa buntag paingon sa New York aron motambong sa miting.
Ang panguna nga agenda ni Netanyahu sa iyang pagtambong sa UN General Assembly gilauman nga mahimong temporaryo nga ceasefire sa Hezbollah.
Sumala sa mga opisyal sa US, ang Israel ug Hezbollah pamilyar sa ingon nga panawagan alang sa usa ka ceasefire.
Una nang niingon si US President Joe Biden nga ang maong plano alang sa ceasefire sa Lebanon ug Israel gi-endorso sa mga nasud nga naglakip sa US, Australia, Canada, EU, France, Germany, Italy, Japan, Saudi Arabia, UAE ug Qatar.
Sa pagkakaron, sumala sa United Nation, kapin sa 90,000 ka tawo sa Lebanon ang nabakwit taliwala sa nagpadayong panagbangi.
