Gipaambit ni Bicol Saro Party-list Rep. Terry Ridon nga moabot sa 215 ka mga miyembro sa House of Representatives ang andam nga moboto pabor sa impeachment ni Vice President Sara Duterte, base sa ilang internal nga konsultasyon sa Kamara.
Sumala ni Ridon, ang maong numero parehas sa mga kongresistang mipirma sa unang impeachment complaint niadtong Pebrero 2025, nga sa ulahi gideklarar nga unconstitutional sa Korte Suprema tungod sa kakulang sa due process.
Bisan pa niini, nagpabilin ang iyang pagsalig nga makalusot ang Articles of Impeachment ngadto sa Senado, tungod kay milabaw pa sa 106 ka boto ang minimum nga kinahanglanon sa Kamara aron mapasa ang reklamo.
Base sa report sa House Committee on Justice, nakit-an sa komite ang probable cause sa mga alegasyon nga naglambigit sa giingong sayop nga paggamit sa confidential funds nga mokabat sa ₱612.5 milyon, lakip ang ₱448 milyon nga giingong nauli sa Bise Presidente.
Gihisgutan usab sa mga imbestigasyon ang giingong ₱6.7 bilyon nga transaksyon nga nalambigit sa pamilyang Duterte-Carpio, ingon man ang mga testimonya bahin sa mga giingong hulga nga gihimo batok sa ubang mga opisyal sa gobyerno.
Gilauman nga ipahigayon sa Mayo 11, 2026 ang botohan sa plenaryo sa Kamara.
Kung maaprobahan, dayon kining ipadala sa Senado, nga molihok isip impeachment court. Target sa mga magbabalaod nga mapaspas ang proseso ug mapasa ang kaso sulod sa duha ka semana aron masugdan ang impeachment trial.
