CEBU – Patay nang nadala sa tambalanan ang usa ka 23-anyos nga lalaki human nabangga ang gimaneho niyang motorsiklo mga pasado alas 12:00 sa tungang gabii, Septyembre 30,2022 sa Sitio Guisoan, Brgy Poblacion, Zamboanguita, Negros Oriental.
Giila sa kapulisan ang biktima nga si Leomar Caingcoy Verances, ulitawo ug residente sa Brgy Nabago ning nasangpit nga lungsod.
Matod ni Police Major Antonio Jabar, hepe sa Zamboanguita Police Station nga gikan sa Maluay paingon sa Poblacion ang biktima sakay sa iyang Honda Wave 110 kolor itom ug pula nga motorsiklo ug pag abot niini sa lugar nga nahitaboan, nabangga kini sa crane truck sa Philsouth nga giparking sa national highway.
Gidali pa pagdala sa Negros Oriental Provincial Hospital ang biktima apan gideklarar kini nga dead on arrival.
Nasayran nga hubog ang biktima dihang nahitabo ang insidente.
