Gisugdan na pag-apud-apod sa lokal nga kagamhanan sa dakbayan sa Mandaue, ang sobra P25 million nga balur sa mga nagkadaiyang medisna ug medical supplies alang sa 27 ka mga barangay health centers sa nahisgutang dakbayan.
Tuyo niini, aron nga di na kinahanglan pa nga moadto sa City Health Office ang mga nagkinahanglan sa mga tambal panahon sa emerhensiya gumikan kay available na kini sa matag barangay.
Gibutyag ni Mandaue City Mayor Jonkie Ouano, nga gawas sa mga nagkalain-laing tambal ug medical supplies, mopuno usab sila ug mga Doctor aron sa pagmonitor sa tagsa-tagsa ka mga barangay.
Gitahasan usab ang Doctor nga maoy mangunay sa pag-aprobar sa ipang-release nga mga medisina ngadto na sa mga sakop sa barangay sama sa mga Barangay Health Workers, aron masiguro ang kaluwasan sa motumar sa mga tambal.
Dugang usab sa Mayor, aduna usab laing batch sa mga tambal nga gikan sa PCSO nga mobalur sa P10 Million nga mga tambal ug laing bag-ong pinirmahan nga P1.3 Million nga budget alang sa hospital medicines and supplies.
