Gipasabot ni Cebu City Transportation Office head Raquel Arce, nga sa kinatibuk-ang assessment sa Semana Santa “generally peaceful” ra, ilabi na sa hisgutanan sa mga aksidente sa kadalanan.
Dugang ni Arce, ang ilahang buhatan walay nahimamat nga dagkong problema sa kadalanan atol sa kinatibuk-ang obserbasyon sa Semana Santa, ug gipanglangtawan niini nga kini tungod kay minus usab ang gidaghanon sa mga sakyanan sa kadalanan.
Mao kini ang nahimong pamahayag ni Arce
atol sa eksklusibong pakighinabi sa Bombo Radyo Cebu newsteam kaniya, aron sutaon ang kinatibuk-ang assessment sa bag-o lang gituldokan nga Semana Santa.
Apan, gitataw niini nga aduna sad silay ubay-ubay nga natala nga road accident, diin gikan sa Abril 2 hangtud Abril 5, adunay kinatibuk-ang road accident nga 47, diin 31 niini ang nalambigit sa motorcycle accident.
Giklaro ni Arce nga ang maong numero sa natalang disgrasya, walay gikompirmar nga namatay, ug ingun man nga minus ang rason nga hubog ang mga drayber niini, ug nagkompyansa lang gumikan kay hawan ang mga kadalanan.
Samtang, gi angkon usab ni Arce nga atol sa kinatibuk-ang Semana Santa, walay bisan usa nga mga personahe sa CCTO ang gitugtan nga mag file og leave, apan gitanyag usab kini sa tukmang day-off, ug kadtong naka file na daan og leave, gibakwi kini.
Ilabi na pag Biyernes Santo nga adunay daghang prosisyon nga gipahigayon, busa tanang dapit nga nagpahigauon og prosisyon, gipahamtangan og mga personahe gikan sa maong buhatan.
Gani, gibana-bana ni Arce nga adunay 235 ka mga personahe sa CCTO ang nadeploy.
