Gikompirmar ni Department of Migrant Workers Secretary Hans Leo Cacdac, gahapong adlawa, Huwebes, nga adunay laing tulo ka Filipino crew members sa bulk carrier MV Eternity C ang nakit-an nga luwas, hinungdan nga ang kinatibuk-ang ihap sa naluwas nga Filipino seafarers niabot na sa 8.
Ang MV Eternity C nga may bandera sa Liberia, nga adunay 22 ka mga tripulante lakip ang 21 ka mga Pilipino, giatake gamit ang mga missile ug rocket-propelled grenades sa mga pwersa sa Houthi sa baybayon sa Yemen niadtong Hulyo 7.
Lima ka mga Filipino seafarer ang naluwas dayon sa kadagatan sa dihang nalunod ang barko tungod sa kadaot nga naangkon niini.
Matud pa ni Cacdac, ang mga taho sa tulo ngadto sa upat ka posibleng mga nangamatay padayon pa nga gi-verify, ug gidugang nga kini makompirmar lamang sa diha nga ang DMW makahimo sa pagpakigsulti sa mga buhi nga seafarer.
Subay sa direktiba ni Presidente Ferdinand R. Marcos Jr., gipasalig ni Cacdac ang mga pamilya sa mga seafarer nga makadawat sila og hingpit nga tabang gikan sa gobyerno, lakip ang regular nga updates ug pinansyal ug psychosocial nga suporta.|Bombo Irene Ardiente
