Gipasabot ni Palace Press Officer Usec. Claire Castro nga ang hinungdan nganong wala giabiabi ni Presidente Ferdinand “Bongbong” Marcos Jr. ang mga overseas Filipino workers (OFWs) gikan sa UAE nga miabot kagahapong sa hapon, Marso 19 sa Villamor Air Base.
Sumala ni Castro, ang Presidente mitambong sa panagpulong sa Economy and Development Council aron hisgutan ang mga importanteng programa sa gobyerno, lakip ang mga inisyatiba sa edukasyon, imprastraktura, ug ang rekonstruksyon ug kalamboan sa Greater Marawi (Stage 2), ingon man ang Unified Grand Central Project.
Dugang niini nga gimando usab sa Presidente nga ang pag-abot sa mga gipapauli nga OFW kay ipaagi sa Villamor Air Base aron mapadali ang ilang pagproseso sa imigrasyon ug tugotan sila nga makapauli ug makauban dayon ang ilang mga pamilya.
Kini giingon aron maibanan ang kalisud nga nasinati sa mga OFW sa dili pa mobalik sa nasud.
Samtang, 317 ka mga Pilipino ang luwas nga nakabalik sa Pilipinas sakay sa ikatulong chartered flight sa gobyerno, sumala sa Department of Migrant Workers (DMW) ug Overseas Workers Welfare Administration (OWWA).
Nidunggo ang eroplano sa Villamor Air Base sa Pasay City sakay ang 153 ka OFW, 114 sa ilang mga dependent, ug 50 ka na-stranded nga mga pasahero nga napugos sa pagpauli tungod sa nagpadayon nga gubat sa Middle East.
Sumala sa DMW, kini kabahin sa direktiba ni Presidente Marcos aron masiguro ang kaluwasan ug kaayohan sa mga Pilipino sa rehiyon.
Sa pagkakaron sumala sa datos niadtong Marso 5, kapin sa 1,700 ka OFW ug sa ilang mga pamilya ang nauli na ubos sa whole-of-government repatriation program.
