Gilaumang mapalapad ang sakop sa programa sa voucher sa gobyerno sa Pilipinas ubos sa usa ka bag-ong balaod nga gipirmahan ni President Ferdinand Marcos Jr.
Ubos niining bag-ong balaod—ang Republic Act No. 12327, o ang Basic Education Voucher Assistance Act ang Department of Education (DepEd) ang gitahasan sa pagtino sa kantidad sa voucher base sa kapasidad sa pinansyal nga kahimtang sa pamilya.
Nagpasabot kini nga ang mga estudyante gikan sa mga kabus nga pamilya mahimong makadawat og mas dako nga kantidad sa voucher.
Ang programa naglakip usab sa mga estudyante gikan sa mga pamilya nga anaa sa middle-income households.
Hatagan og prayoridad ang mga estudyante gikan sa mga pampublikong tunghaan nga naghuot na pag-ayo, ug kadtong nagpuyo sa mga lugar nga walay duol nga pampublikong tunghaan.
Apil usab niini ang mga estudyante nga walay access sa igong gidaghanon sa mga asignatura o electives sa ilang senior high school, nga naghimo nga gikinahanglan ang ilang pag-eskwela sa mga pribadong tunghaan.
Ang balaod nagmando usab sa pagtukod sa usa ka Bureau of Private Education.











